يازين صوت اللي على الجوال قالت لي الو

[سعيد مقبل الأكلبي]

بغيتها غزلية واخذت منحاً آخر
اقبلوها الله يقبلكم

يازين صوت اللي على الجوال قالت لي الو=وانا وجوالي لراعي الصوت رحّبنا سوا

حوّل على قلبي مع الشريان محوال الدلو=في قاع عدٍ ماحه الميّاح يوم انه روا

كنّه يرشّ الكبد شلاّلٍ تحَدّر من علو=يوم انها ضحْكت ولعب الصوت بغصون الهوا

قالت عسى ماني بغلطانه وقلت الها ولو=مانتي بغلطانه وجوّالك على النمره غوا

قالت اربّك حلو قلت ابشّرك ماني حلو=واكشخ مع العالم لو ان الذيب في جيبي عوا

قالت بعد طالب؟؟ترا الطلاب ياما أملو=في فزعةٍ من عند رب الكون شديد القوا

والا معقّب من لهيب الشمس في راسك غَلو=وجهك من الشمس وحرارتها مع القيظ انشوا

والا شريطي تاكل العُربان لامنهم كلو=ودّك تحوش المال لو هو بين فلقات النوا

والا على الخط السريع تنافس اللي حملو=لاضاعوا الرُكاب منك ايجيك في راسك خوا

او عسكري تنقل زهابك كل مالجيش نقلو=وان فاتك الطابور جا عندك مثل صفق الهوا

قلت اي نعم في العسكرية وان زعلتوا فازعلو=على رقم عريف وعيوني على رقم اللوا

والبيت والموتر على الاقساط والربع اكفلو=اثنين مسجونين والثالث بعد ماكل هوا

ودخلت في الاسهم مع اللي قدّر الله وادخلو=واكلت فيها من الخساير شي فوق المستوا

وتحويشة العمر اخذوها اللي خذوها وارحلو=والبيت والموتر تولّوها حرامية سوا

واليوم ماغير ابتسم واسلا مع اللي قد سلو=واحاول انسى كل شيٍ فات ولاّ وانطوا

لايمكن استسلم ولا اول ول مع اللي ول ولو=لو كان حظي لانخيته قال لي مالك لوا

قالت عسى الله ينفعك موّل مع اللي موّلو=مشاكلك واجد ولاعندي لها طب ودوا

مانيب ابي لي واحدٍ توّه يربي له فلو=يهد طيره من صلاة الصبح وامسى ما اشتوا

حنّا ندوّر للشباع اللي تملّوا وامتلو=لاكلّمتهم بنت جوها بالرصيد وما حوا

استاذنك يابو مشاكل يامعذّب ياحلو=واحاول ادعي لك لامنها نامت عيون الجِوا

واقفت وانا انّس في جنوبي مثل مجْذاب الدلو=في جال عدٍ ماحه الميّاح والحبل التوا