راحت يابونايف وانا أشوفها شـوف=غصـبٍ علـي ولاقـدرت أحتميهـا
راحت وهي تبكي من القهر والخوف=ودموعهـا تـذرف علـي وجنتيهـا
من حر مافيهـا تصفـق بالّكفـوف=مقهـورةًٍ بالغصـب مـن والديهـا
تقول شف لك حل واقـول مكتـوف=مكتوف الايدي دونها كيـف اجيهـا
ماهي قريبة جـد والسلـم معـروف=ولاهي تباع ادفـع لهـم وشتريهـا
ولاهي بزرق رماح ومضارب اسيوف=والله لأشب الحـرب واقـول أبيهـا
الي تمكـن حبهـا داخـل الجـوف=تأمر علـي قلبـي بأشـارة يديهـا
القلب يا مبارك عن البيض مصروف=مـا يقبـل الـي ينصحـه مبتليهـا
والله لو جابوا طوابيـر واصفـوف=يا البيض ما وحـده تغطـي عليهـا
هي زينها خلقه مكمّل ومـا صـوف=من رأسهـا حتـى وصـل لقدميهـا
من بعدها مني غدى القلب مخطـوف=متعلـقٍ فيهـا وانــا مهتويـهـا
سميتها لك نوف لكن ماهـي نـوف=خـوفٍ مـن الحسـاد ومراقبيـهـا
ترى اسمها مربوطٍ في خمسة حروف=آلفٍ و يا والنـون مشبـوك فيهـا
يابواظهير ان كان ماجبتلـي نـوف=تكفـا تـرد القـلـب لا يقتفيـهـا

حي الجواب اللي وصلني على اوف=أبيـــات شــاعــر وافـــيــه مــنــتــقـــيـهـــا
ماجابها سلفه ولاهوب ملقوف=شــاعــر جــزل عـن الـهــزل يـحــتــمــيها
رام المراجل بالمراجل له وصوف=ذروة ســنــام الـطـيــب هــو مـعـــتــلـيــها
حر وفعله بين الأجواد مشيوف=مــن لابــة ٍ والـعــز مــنــهــا وإلــــيــهـــا
آلاد عاصم لاغشى الجو عاصوف=هــم مــنوة اللي نصــرتــه يــرتـجــيـهــا
قطم المحازم ذخر من جاه صادوف=الـلابه الـلي ٍ عــز مـــن يـنــتـــخــيــهــا
ياقرد حظ اللي يحوفونهم حوف=وياحــي فــال المنتخي فــي حديــهــا
خالد كتب يشكي على الزين ملهوف=مــزيونة كــــل الحــــلا مــحـــتــويـــهــا
يقول راحت غصب وعيونه تشوف=أقــفــت وهــو مــن لهـفــتــه يـحـتريهــا
ويقول راحت خوف والدمع مذروف=ومــن الـقــهر تصفــق عــلى يـديـْـتـيهــا
وانه يبيها لو حصل دونها حتوف=لاالحــرب ولا ّ الــمـوت عــنـْـه يحــديــهــا
مايدري إن الوصل محكوم بظروف=نرضــى بهــا لـــوكـــان مــانــرتـضيــهــا
ثم حط لغز ٍ بآخر القاف مرصوف=عــن إسمــها خـايــف مــن مـعـانـديــهــا
يبييني أفزع وأطوي الطرق وآطوف=ولا مـعـــي صــوره وأطـــرّب عــلــيــهــا
وشلون أبنفع صاحبي وأدحم كتوف=وأنا أجـهـــل الديـــره مـــع سـاكــنــيــهــا
لكن بقول الحــل والحـــل معـروف=وأول حــلولـي شـــوفــنـي بـــبــتــديــهــا
خل حبلك بإيمـان مولاك ملفوف=وهمــوم قــلـبك كــبــهــا لا تــجـــيــهـــا
إصبر عسى الله فيك ياخالد يروف=والله يهـديـلـك أهـلــهـــا ويـهــديــهــــــا
وإن كان ماجت لك ترى منت معيوف=وافي وكــل ٍ صـحـبــتــك يـبـتــغـــــيـــهــا
فـ البيض واجد من غرانيق وخشوف=شف وش يبي قلبك ومن تشـتـهــيــهــا
والله تجيلك صاغره وأنا أخو نوف=إما نكـحـلــها أو إنـــّـا نــْـعـمـيـهـا
والقلب دوسه دوس ماربعك ضعوف=أبك انت إبن عاصـم فـلا تــقـتــفــيــهــا