[الطائر المهاجر]

وجدت ابنتي تهديني اغنية راشد الماجد يابوي ، فكتبت هذه لها ولإخوانها في الغربه

ياشينها الغربه اذا صار مغليك= في ديره وانته بعيد بديره
مايدري اللي من زمانك يعنيك= ولا تدري اللي من زمانه يضيره
مهما تصبّر فالألم دوم حاديك= تبدي الشجاعه مير نفسك كسيره
تحسب متى يرجع تشوفه حواليك= وتخاف لا الاقدار لحظه قصيره
تضرب بلا موعد وتهدم امانيك= وحلمٍ بنيته ينحرف عن مسيره
لا بد ما تصبر وتنصى لواليك= رب قديرٍ كلنا نستجيره
وتدعي له التوفيق يحمل مباديك= ويرجع بعلمه والعلوم السفيره
الله كتب فرقاه ماهوب بيديك = والله يسهل كل دربٍ يسيره