عاهدتني بالحب بينك وبيني= وحلفت غيري ما توده وتغليه
وعيشتني الآمال تشعل حنيني = أحلم بيوم القاك وافرح واهلّيه
صدقت حلفك واخذٍ باليميني = وانّك ستير وما تبي العشق واهليه
احسبك مثلي جاهل به يقيني= واثري لوحدي من جهل في مفاليه
من علمّك درب الهوى تبتليني= وتنصب شباك الوهم بالحب تعليه
تلعب عليّ وتخفي اللي دفيني = وتضحك بعقل اللي بهرجك تسليه
مشيت معك الدرب تمسك يديني= كالطفل جاهل خايف انك تخليه
تسولف عليه وبين حين وحيني = تغطي عيونه خايف الشمس تصليه
وانا على شمس الحقيقه يقيني = مانيب من يمشي بظلما لياليه
ما اظن مثلك من احط بيميني= وما اظن مثلي من ميالك يماليه
ارحل لعل ارتاح باقي سنيني= وافوق من سكرتك فالكاس ماليه