اخواني الكرام
اليكم جديدي امل ان يرقى للقليل من ذائقتكم

يالله يامحيي العظام الهشيمه= ياخالق الانسان من لازب الطين
نفخت فيه الروح وسط المشيمه=مضغه خلق منها ملوك وسلاطين
ومنها خرج قانع وطامع رشيمه=والعلقمي منها خلق واهل حطين
ومنها الوفي لو صار شايب عشيمه=اهل المواقف بالجمالات ساطين
ومنها البخيل الي وصوفه دشيمه=ماينفع اهله لو بغوا منه قرطين
ومنها أشجّرة زقوم واخرى بشيمه=وبعضها حنضل وشي مثل يقطين
اليوم قل الطيب واهل الحشيمه= ماباقي الا خلق مثل القياطين
اهل الردى واهل النفوس الكشيمه=الي لدرب الزيف دايم مواطين
والحقّ هذا الوقت مافيه شيمه = ذل الكرام وعز به ناس واطين
عقب التراحم حل فيه الوشيمه = وصاروا اهل الصدق بالعين مخطين
يارب جنبنا العقول الغشيمه= والطف بنا من وسوسات الشياطين

وهذه معاني لبعض الكلمات

رشيمه:من يتشمم الطعام ويحرص عليه
عشيمه:الشايب المنحني الظهر
دشيمه:الذي لاخير فيه
بشيمه:نسبه الى شجرة البشام ذات الرائحه الطيبه
كشيمه:ناقص الخلق والحسب
وشيمه: العداوه