الكرم حكرٍ على اليمنا الصخيه = والصخا طبعٍٍ بعربين المجاني
مرةٍ لفو ضيوفٍ بضحويه = وفعت اهلّي مرحبا باللي لفاني
وطبعنا عقب النبا والشاذليه = نكرم الخطار بالحيل السماني
رحت يم فريح ابدّين طليه = خابر بشبكه ذبايح من زماني
يشتري ويبيع والناس الوفيه = تنطحه وانا ليا جيته عطاني
ويوم جيته وان مرحانه خليه = والطيور تحوم ماكن شي كاني
ورحت له فالبيت والصدمه قويه = وقدم عيني واجب طوال اليماني
قالو انه فالصباح وفالعشيه = منشغل في سوق الاسهم يا فلاني
وغيّر اسمه في سجل التابعيه = انس لسم فريح واسم فريح هاني
ورحت يم البنك وليا هالبليه = طايرات عيونه ازهم ما يراني
وفي يده مويه ويابستن شفيه = مختلف ما كنه الا شخص ثاني
قلت له سلام قال اصبر شويه = مشتري بالنقل وسهمه في طماني
وبالمكيرش والمكيرش في نحيه = حظي النحس امتحني وابتلاني
وزين وجهك جايني ياهالوذيه = لا وتبغالك طي في هالمكاني
قلت انا صاحبك لكن لد فيه= واجب الضيفان ياهاني حداني
قال انا ابي هذي وضيعت ذيه = كل مملك راح مني في ثواني
استدنت من المريكي فوق ميه = ولفني هامور مدري كيف جاني
ولاني لحالي مسوي هالسويه = كل من في صالة الاسهم يعاني
فالبدايه طيح ياراع الرديه = وآخر المشوار ماجاني كفاني
ولا بقالي لا كثير ولا بليه = ضاعت الهقوه وضيعت الاماني
وابعود لليال الاوليه = واكتب اسم فريح واكنسل لهاني
وعفت منه ورحت يم صحيب ليه = ويسر الله واجب طوال اليماني