[مروان الشيخ]

لا وا حسافه يا عرب وش تسوون=عار(ن) على الامة وخيبة كبيره
هي ناقصه يعني حماقات وجنون=هي ناقصه فتنه وفرقه وحيره

كافي مصايبنا على يدين صهيون=نكبة.. ونكسه ..والمصايب كثيره

يكفي ألم بغداد واهله يعانون=الموت كل لحظه.. وعالي وتيره

ولبنان يحكمها سياسة(يخونون)=الوضع سيئ كل شي(ن) يثيره
وثالث اثافيها على ما يقولون=وآخر مسامير النعش فالمسيره

الانتفاضه همها مال قارون=كل(ن) يبي كرسي وغرفه وثيره

نفس السلاح اللي للاعدا يعدون=يقتل بها المسلم بايادي حقيره
يعني اذا ارتحنا من القرد شارون=يظهر لنا شارون في كل ديره
والمضحك المبكي على ويش يسعون=سلطه بلا سلطه وحاله كسيره
والكاسب الاول بلا شك ممنون=الغاصب المحتل عينه قريره

وينك سحابه امطرت عهد هارون=دارت علينا حالة(ن) مستديره
حنا العرب تقريب ميتين مليون=من بين هالعالم نعيش بحضيره
الاجنبي يعبث..وحكام لاهون=واعلامنا فتنه ..وشوف الجزيره
والشعب في حاله من الضعف والهون=ممنوع لو فكر يحدد مصيره
عزي لامه للمهانه يقادون=لاعاد به نخوه ولا عاد غيره
يارب تخزي ابليس وابليس ملعون=وتمرر الازمات سهله يسيره