العيد طل وقلت حياه حياه =يامرحبا ترحيب من عيد لا عيد
كلن يعايد من يعزه ويهواه=وانا بعيد على إللي جايب العيد
ابتعنـى واتمنى ملآقاه=وا بتغنى يالمعنىإبتنهيـد
عيـدك مبآرٍك جاء يشارك من اقصاه=حب اختيارك ثم زارك من بعيد
اعايد من يعيد دمي في مجراه=وينبضه قلبن يضخ المواريد
اعايد من يعيد لشايب اصباه=ويشيب رموش الصغار المواليد
بعايده وعيد حلفن عهدناه=وكدله اني هايمن فيه توكيد
العيد جمع اهل القلوب المنقاه=لا قلت لك هاذي قلوبن مفاريد
حي الوليف الي يشوفه تمناه =يامنوتن للقلب والعين والايد
ياعين حرن ينفض الريش بسماه= ماغير يهوي لا صعد بالمصاعيد
العين بحر العشق والنون مرساه =ولا رموشه مثل طلق البواريد
وشعاع فمحياه ولا شفاياه=ولا النحر كنه نهارن واساويد
وجديل لونه مثل ليلن تغشاه =والجسم مهيافن على كيف متريد
ادعج غنج عمهوج سبحانه اعطاه =الله خلقها غير عن كل هالغيد
جمالها منهو يبا يوصفه تاه =يتوه توهه مالها ايات تحديد
حكيم شوره ياعرب ضيع ارياه =وعقال من شوفته صارو مقاريد
ياحارق شعور إمتبلد اوتصلاه=يامطفين نارن توقد تواقيد
عساه يسلم من عواذل وتفداه = وفدوته نمام اواش اوحواسيد
من قاللك بعدت بعدت خطاياه= تراك منت بعيد والله في عيد
احب انا لا ماه واكره لفرقاه =متجودن بحبال وصله تجاويد
ياروح قلبي روحت إمقيط ورشاه=ياشوق قلبي شوق عليا لبو زيد
واهيم فيها هيام مجنـون ليلاه =ومستاسرتني مثل اسر المعابيد
وحبي لها من حب نمرن لوضحاه=واحفظها حفظ الذاكره للخواليد
يكفي على طيفك تشوف المناجاه=يكفي على ذكرك دموٍعـن مجاديد
غلاك عندي باركاتن مطاياه=ومعقله عندي يابنت الاجاويد
من هو يقول ابامر الحب وانهاه =يمسي عليه الحب ويصبحه سيد
يلي تقود الذايرات المحماه = ماردني عن شفكم زيد وعبيد
بعدك مع غيابك ترى ماقويناه = مقوى على الفرقا وهم التصاديد
ياشين هجرك ياوليفي ياشيناه =تقول سم اذحاح وسط المكابيد
لو التوجد فاد قلبي ووجداه=واكثر عليكم يالغضي بالتواجيد
عزاه يامغوي كثيرين عزاه=ياطارح الخيال ويا الصناديد
عسى السحاب اللي تراكم امنشاه=سود الغيومي مرزمات الرواعيد
حتى يزين القاع و الزهر يزهاه=فيه الزهور انواع ويا التغاريد
وختامها ياصاحبي مابديناه=عيدك مبارك ياعساكم معاويد