المعذرة على حذف بعض الأبيات الغير قابله للنشر لخصوصيتها ودمتم بخير
القصيدة بدون مقدمات
حد المغفره
ليه لا ناديـت قلبـي قلـت مـا ودّك نتـوب = ما يجاوبنـي وكنّـه لادعيتـه قلـب صخـره
هو سجن نفسه بنفسه فـي مغـارات الذنـوب = والمسافه بين حـد المغفـره والذنـب شعـره
وللمعاصي ألف باب من الشمال إلى الجنـوب = وكل ما ردّيت واحد يفتـح الشيطـان عشـره
مغريات الوقت صابت خافقي من كل صـوب = ودايم اللهّم فغفر مـا صنعـت بجهـل عـذره
لامتى ياقلـب غافـل مـا تنبّهـك الخطـوب = كنّ مال الحق صوت وكنّ مال الموت سكـره
لا متى هـذا التبلّـد لا متـى هـذا الهـروب = لامتى ننزف معاصي لا متـى بنقـول بكـره
ياهوى نفسي كفايـه كـل مـا فينـي يـذوب = احترقت بنار ذنبي لو حسبنـا الذنـب جمـره
للسعاده درب واحـد وللخطـا عنـدك دروب = ومن عرف درب السعاده يشرح الرحمن صدره
أسـأل الله العظيـم الفـرد عـلّام الغـيـوب = مايواخذني بضعفـي ومـا يحاسبنـي بمكـره
يهدي النفس الضعيفه قبل تشرق مـن غـروب =قبل ماروحي تغرغر وانتهي في حضن حفـره