[سهيل الشمري]

فار دمّ الشمّري لاجلك وشاش = والقوافي من طنايا جتْ تهوش
والزّرمْ نرْفزْ لوجهٍ به بشاش = والطّناخه سكّره مِرِّ يجوش
يابعد حيّي ترى مابه نقاش = جيت وعروق الضياغم لي تنوش
من عقب ماضايقتْك اهل العشاش = وافْحموك بصنْع تاريخ مغشوش
لايهمّك عذْل من دوره هماش = مِسْرديِّ مانهل عزّ العروش
مايطول من اللحم غير العراش = ولا ينول من الكسب غير القفوش
سحْب صيفٍ ماورا برقه رِشاش = لاتهشّ ولا تنشّ ولا تحوش
وانت يالعزوه مدام الحقد ناش = مادعى دمعتْك تكسي للرّموش
قلْ هلي بيّاعة العمر فبلاش = لاتعزْووا واطبقوا مثل الوحوش
الطنايا مرْوِية حدْبٍ عِطاش = الطنايا العزّ والطيب الرّهوش
هم هلك ياعين من لارْضاك هاش = يوم كدّر خاطرك دفّ الدّحوش