قصيدة الشاعر ناصر الفراعنة في برنامج شاعر المليون التي ألقاها في مسرح شاطي الراحة في أبوظبي
ناقتـي يا ناقـتـي لا ربــاع ولا سـديـس= وصليني لابتي مـن وراء هـاك الطعـوس
حائل (ن) رابع سنة من خيـار العيـس عيـس=خفهـا لا درهمـت كنـّه بالنـار محسـوس
في دجى خالي خـلا لا حسيـس ولا نسيـس= تنوحي من شدة البـرد طقطقـة الضـروس
في عيوني يكفخ الطيـر ويطيـح الفريـس=وأنتهض جساس من دون خالته البسـوس
وفي خفوقي فرخ جنية (ن) يضـرس ضريـس=يوم أوردها هجـوس وأصدرهـا هجـوس
ديرتي دار ابن ضاري وابن غثلـم جريـس=ديرة اللي دوجوا في فيافـي نجـد جـوس
ديرتـي يا بنـت شيخ (ن) ومعدنهـا نفيـس=عيطموس (ن) دونهـا دثرتنـي عيطـمـوس
جادل (ن) مطرق جسدها مـع الغربـي يميـس=طينة (ن) من تربـة الخلـد والـدم محمـوس
نقشت خمس (ن) من الخمس في يوم الخميـس=ليـت شعـري مـا أرادت بهـذا دختنـوس
كـم تمنـى إن معـه مثلهـا فتنـه ابليـس=كان يمكن قد قلب نصـف إمتنـا مجـوس
كن دماث الصدر منهـا كنيسـه أو كنيـس=صومعة رهبـان ديـر (ن) يـؤدون الطقـوس
آتقـوس مـع تقـوس نواهدهـا وأقيـس=قبتين قـاب قوسيـن قوس (ن) جنـب قـوس
خصرها يحكي لنـا واقـع القـوم التعيـس=وردفها عن غطرسة بـوش يعطينـا دروس
وبالرغم من قصرهـا ما يجالسهـا جليـس=تصبح أطول نسوة الأرض في وضع الجلوس
العروسه ما تبي غير أبـو تركـي عريـس=لعروسه نجـد ما هيـب حـي الله عـروس
نجد بنت المجد ونسـة مونسـة الونيـس=ما عسفها الا معزي ضحى اليـوم العبـوس
كل أهل نجد هلي من أجاء حتـى الخميـس=في ذراهم بألتجي عـن مجففـة الرسـوس
وعيشتي ما بين أسود (ن) ولـو مانـي رئيـس=خير من كوني رئيس (ن) على شلقـة تيـوس
وليس عيب (ن) إن خدعني بمكـره كـل هيـس=لأن ما يفهـم بمكـر الهيـوس الا الهيـوس
مصطفى في مأدبـة عمـه البابـا لويـس=كبر اللقمه تحـت ضـؤ حمـر الكـؤوس
وطسم حدتها على حائـط المبكـى جديـس=يوم شقـت ثوبهـا بنـت عفـار شمـوس
سيدة هـاك القصـر اسمهـا الأول لميـس=دونها سمر الحناجـر بترهـا حـد مـوس
قسقسـة لأحرارهم . قيس . قيس . قيس . قيـس=وألبستهم مـن مهانتهـم أنـواع اللبـوس
بين خدعة كعـب أخيـلاً ومولـد أدونيـس=درسونـا الاّلهـه والمـدرس هـنـا روس
ويش لاقوا من قناة السويس أهل السويـس= وويش لاقوا من تلمسان قوم (ن) من سنـوس
كلهم من شـدة الجـوع راحـوا خندريـس=بين غيبوبة مخدر وصحوة عـرق سـوس
ثـورة راحـوا سببهـا بتـوع الأتوبيـس= وش نبي فيها وهـي ما تهـز الا الغـروس
آفة المرء اثنتان ألف كـاس وحـب كيـس=والنفوس اليا بغيت اتعرفهـا ارم الفلـوس
ينكشف زيف الشعارات الى حمي الوطيـس=ترجع الأذناب أذناب وتبقـى الـروس روس
صدق لا قال العرب ما يحـوص الا الخسيـس=ولا يوط الروس شيئ (ن) مثل ضعـف النفـوس
تقديري للجميع .