:
:
لاني اعشقك همسه في نبره صوتي المبحوح=واعيشك فالحشا نبضه تعانق دم شرياني
ابي ابني مشاعرنا سفينه زي سفينة نوح=وباحمل قلبي وقلبك واجدف لك بوجداني
واغني لك على ظهر السفينه غنوه المجروح=واعزف لك على اوتار الفراق أمرّ الحاني
وابحر في موجعنا وادور للسفينه روح=اخاف ارسي بامل كاذب بشاطي دمع حرماني
هناك بعالم الذكرى يناديني حمام ينوح=يحاول يسحب يدين الخفوق لعالم(ن) فاني
ومهما احاول اخبي عيوني.. بالدفين تبوح=وتحكي بالغرامي اللي ذبحته قبل يحياني
بنيت بحلمي الوردي قصور من الفرح وصروح=صحيت ومالقيت اللي بنيته غير احزاني
جمعت طيوف آمالي وقلت لعالمي مسموح=ابرحل داخل اعماقي بالحادي وايماني!
تعبت اناظر الساعه واقضّيها حكي ومزوح=وانا احس بعقاربها تعاني كثر ما اعاني
سما تمطر أمل كاذب وطوفان السراب يلوح =ولا عاصم.. ولو بارقى جبل واتسلق اكفاني
بنيتك يا مشاعرنا على هيئة سفينة نوح=عشان ارسي على الجودي ونبدا عمرنا ثاني
:
: