السلام عليكم ورحمة الله
اسمحولي يالفطاحـــلة من غــلاكم ابفضفض عليكم
وماهو بالخاطر ليس بناطر
البارحة يوم مزن الوسم هماله=الكل اشوفه سعيد وحيل متهني
احدن نصى ديرته واحدن مع عياله=واحدن على موتره مبسوط ويغني
وانا ظروف العمل تشبكني حباله=مع كل قطرة مطر دوامي يلزمني
اربع وعشرين ساعه نرقب هلاله=مع دوني واقبال وحشمت واحمد وحسني
وانا هواوي وشوقي فايح دلاله=عقب المطر يم (رغبه) خاطري حني
وظنايه اللي يأس واستفزع بخاله=يقول بابا بعيدن مادرى عني
ماخذ له ايام مابين بمدهاله=وابيك ياخالي يم البر تاخذني
ياعزيز الله وكيلك حالتي حاله=لو تدري وشهي ظروفي كان تعذرني
الوقت قاسي وظرفي زايد اقفاله=وغبر الليالي يابوك اليوم حدني
حاولت وقالوا النظام وقلت يافاله=علي وغيري بيطمر طمرة الحصني
خالداسيرالعمل مابين بنقاله=وبعض العرب في رحى الصمان مستني
ومعها جهازن يسمى برافو ارساله=من وين مارحت ياتي بالخبر عني
لوي ورى طويق لوي زابن جباله=ارساله يحوم فوق الراس يتبعني
ومديري اللي طوال الوقت جواله=رقمه على شاشتي ياكثر مارني
يامر جنوب الرياض ويامر شماله=ومرن على انفاق خط الخرج يامرني
يقول جاني بلاغ بكثرة اعطاله=واكتب لي تقرير وهات العلم وافدني
والبلشه ان المقاول فالعمل عاله=ردي فالشغل ولاهو يملك الفني
الفني اللي خبير بيتقن اشغاله=لاحدد العطل ولاهو اللي ساعدني
برد وهبوب ومطر وبروق شعاله=والخط مزحوم ذا يبعد وذا يدني
ويشهد لي الله صرت بوضع يرثاله=ويشفق على حالتي من كان يحسدني
يوم انتحى الليل مسرع دز مرساله=ابرق خطابن غريبن فيه ينذرني
قلنا العدل مير زادالظلم مكياله=حكمه مهو حكم واحد مذهبه سني
خطا خطا اللي مرسي العقدواعماله=واضح خطاهم ولكن صرت اناالمجني
وفي هالزمان الغريب اللي نكس حاله=رضيت بالظلم لوهو مر يالمني
فيمامضى افرح بشوف الغيم واسعاله=واليوم لا لاح برقه زادبي حزني
ويالله يامدبر ابن ادم على احواله=تفرج لمنهو اسير المكتب الفني