[عيدالماجد]

مسكين ياللي خانك الوقت والناس=وخلوك وحدك في مدينه غريبه
من حقها لو تختنق فيك الانفاس=معذوره انفاسك حياتك مصيبه
احنا بدنيا كل ضعيف ن بها انداس=ماينفعه صدق النوايا وطيبه
احنا بزمان ن ماصفا فيه جلاس=ناس ن كذوبه والصدوقي تعيبه
ياصاحبي اصبر ولاتوطي الراس=مهما غزت نفسك ليالي عصيبه
خلك كما موج البحر عالي الباس=ومايصيب ذا الانسان الا نصيبه
دنيا بها تحيا ترى اجناس واجناس=منهم كريم ن ميتندم طليبه
ومنهم حقود ن معدنه خبث وانجاس=مهماكبر سنه وبين مشيبه
هذي هي الدنيا بها حزن واعراس=ناس تعيش بعز وناس كئيبه
وناس ن تذوق الذل كاس بعد كاس = وتصبر على مر الزمان ونحيبه
فيهم كرم غطى على باقي الناس=وفيهم شهامه بالظروف الصعيبه
وفيهم رجوله وخافق ن حر حساس = وافعالهم وقت الشدايد عجيبه
وصلاة ربي عد ماهب نسناس=واعداد اطلوع الهلال ومغيبه
وصلوا على سيد البشر هادي الناس = مرسول ربي مصطفاه وحبيبه

مع اطيب تحياتي للجميع متمنيا ان تعجبكم هذه القصيده وعذرا على التقصير وطول الغياب اخوكم عيد الماجد