السلام عليكم ورحمـة الله وبركاته
أضع هاالابيات بين أيديكم
ولا تشرهون على صاحبها هههههههه اللي هو أنا ، مابين حايل والقصيم
مالي با الزحمـه وها الحركات
وبعد زيارتي للرياض ، شوي فوووق وشوي تحت
من مخرج لمخرج وحالتي حاله
وكان برفقتي أحد الشباب ونقوله ( تنـوج ) 
أترككم مع الأبيات
واوجودي وجد منهو راح ناوي للزياره=للرياض العاصمه يا الله عسى خيره يديم
وسط زحمات المواتر صار تايه في مساره=تايهً(ن) من غير وجهه فاقد الدرب السليم
من يشوفه في مساره قال ذا ياخوك طاره=طايره عيناه كنـٌه داخل السكه فهيم
مادرى إنه مايفرق بين طلعه وانحداره=مايفرق بين لفـٌه او طريقً(ن) مستقيم
بين كبري وبين مخرج والتقاطع والاشاره=يا الله إني داخلً(ن) بك يالطيف وياعليم
كل ماجيت التقاطع حان وقت الاستخاره=وين أوجه كل درب في عيوني (سيم سيم)
واوجودي يا الرياض ليلها شابه نهاره=قمت افكر كيف عايش من بقى فيها مقيم
والبشر ماترجهن مابين روحه واستداره=طايره في وسط عجٌه مثل ذرات الهشيم
قالها اللي مايتابع للتطور والحضاره=كل ماناظر لمنظر راح في قافه يهيم
يوم شفت الفيصليه قلت ياطول العماره=اشهد أن اللي ملكها ماشكى الحظ العقيم
رحت سارح با المعالم والمناظر والاثاره=كل من ناظر لشكلي قال صحصح ياغشيم
قلت مالي غير (أُجـره) ياعسى فيها جداره=دلنٌـي ياجعل ربي يرزقك خير ونعيم
لي حوالي فوق ساعه كل لحظه وسط حاره=وين الآقي يارفيقي مايسمى با النسيم
قال تابع موتري وارفع على ضو الإناره=وادفع اللي تدفعه وانت رجالن كريم
صرت مثل اللي مبشـر يا النشاما في بشاره=مثل من حصل مراده في دجى الليل الظليم
رحت للشقه عيوني ينطلق منها شراره=صرت ماسك للمخده كنٌها الخل الحميم
وفي منامي زارني من طال بعده وانتضاره=نور قلبي غايتي في ظلمه الليل البهيم
في خفوقي زاد قدره واشهد ان القلب داره=نظرته تبعد همومي تشفي الجرح الأليم
لو رحل يعلن خفوقي من بعد هجره دماره=واعذابي كيف يهجر عادته فيني رحيم
يشهد الله وسط قلبي صرت باني له مناره=أعشقه ولا عليٌه من عذولي واللئيم
يامر وينهي وقلبي ينتظر منه الاشاره=يقتلب عمري بدونه من نعيمه للجحيم
يوم زان الحـلم ، جاء من يحرق أحلامي بناره=صاحبي تنوج جاني قال أصحى ياسقيم
حاس حلمي واعذابي راح من طال إنتظاره=ياعسى ربٌي يعوضني بجنات النعيم
وسلامتكم والعذر على الإطاله
تحيتي