كلمات احمد الناصر الأحمد واداء عبدالله المهيدب
ملاحظه الملقي اضاف ابيات لم اجدها ضمن القصيده في ديوان الشاعر
نسيتـي المـزح بالقبـة=ونسيتـي لعبنـا الطبـة
نسيتـي كشختـي دايـم=بثوب دوبلين خبخبـة
نسيتـي غتـرة الملمـل=تغطينـي تقـل جـبـة
نسيتي الركض بالطايـة=لاصار بدارنا شبـة
لاجابوا فضلة القرصان=نتسابـق ودنـا نلبـه
نسيتي إزعاجنـا لمـك=وهي بالحـوش منكبـة
نسيتي معلف ام العـوف=تظفينـه وانـا اكبـه
نسيتـي ثوبـك الترتـر=وغيظك لأنقطع حبـه
نسيتـي بسطـة عزيـز=ايلاجاء العصر بالقبه
نسيتي خرطه الماصـل=يجيب الحكي مـن عبـه
نسيتـي القربـة الشنـه=وماهـا البـارد نقبـه
نسيتي قولـك معصقـل=وانا اعيـرك يالدبـه
نسيتـي نعالنـا التليـك=هي الموتر ونلعب به
نسيتـي موعـد الحنـا=ايلا جاء صابكن خبـه
نسيتي طيحتـك بالليـل=وهي ظلماء وانا السبه
نسيتـي اكلنـا الهبـود=نتناقر والسبب حبـه
وامــك لاتهاوشـنـا=وتحط بعيوننـا شبـه
نسيتـي ثوبـك الكرتـه=ننكـت فيـة ونشـبـه
نسيتـي كحـة الـمـذن=قبـل يـذن يبـي ينبـه
نسيتي تريكنا المصنـق=نغسلة قبل ما نسبـه
وندعى ربنا يكود العنـز=تجيب وليد نلعب بـه
نسيتي كيف اوصف لك=زمـان يعلمـه ربـه
حلو رغم الفقر بالحيـل=زمـان راح ونحـبـه
نسيتـي ليـه مـا ادري=دخلتي الوقت من جبـه
لك الفديو لـك التلفـاز=لك المكياج مـا احبـه
لـك الدنيـا بزخارفهـا=وعطيني حظار مع قربه
ومعهـن مسفـع بالـي=وثوب اللاس والطبـه