الفتنه اللي علمت رشفة الكوب=ان الحلا لو قل يطغى حلاها
ياليتها ما درست ميلة الثوب=على الهوا والناس تمشي وراها
كن الخصر تصميمها بالفوتوشوب=ماتشيل همه يوم تلبس رداها
بينه وبين الصدر طالب ومطلوب=كلاً على الرزه يدور رضاها
قسوة كمثرى لا تثنت تحت روب=وانعم من الورده ليا زاد ماها
ماهي بحاجة صبغ أو خافي عيوب=من حسنها كن المرايا تباها
لاوقفت قدامها ماش عذروب=لكن تذكر نعمة اللي عطاها
سحر النفود بخدها حزة غروب=وجمرة غظا مكتظة" في شفاها
امن الحيا لاسولفت كنها تذوب=وانا اشوف اسيوفها في حياها
قالب ثقافه داخل الثغر مسكوب=في اسمها في شعرها في مداها
من ذوقها احس ماعندي اسلوب=ما كني الا غيمة" في سماها
وان جيت للهيبه تقل شيخ منصوب=منصوب دوله في ديار اغرماها
بنت الشيوخ معربه مابها شوب=من دونها جفت حلوق اخطباها
كم راس قوم قال والله ما اتوب=لاجلس اعزوبي والعمر من فداها