بسم الله الرحمن الرحيم
مساكم الله بالخير أحبتي في الله
أطرح أمام اعينكم هذه المتواضعة علها تجد القبول
أقول ...
ياهل البداوة علموني بالأخبار=حال الرحايل والفلا والمداير
خبري بكم تشكون من قل الأمطار=يالله بنوٍ مدلهمٍ وداير
نفرح بخير الله ونبهل بالأذكار=وماقدر الله للمخاليق صاير
ويابنت فكري زودوا فيك الأمهار=وانتي أصيلة تسلبين الضماير
فيك الجمال وفيك حكمة ومخبار= وفيك النعيم وفيك وهج السعاير
وياللي غزاك الهم والهم مغوار= قبلك على الأجواد كال الذخاير
مير استعن بالله للأوزار غفار=وحده ملاذ العبد لاصار حاير
تمضي بنا الأيام والحال تعبار=يوم نعد الربح ويوم الخساير
والغانم المسعود والفالح البار=من ينفعه زاده بويم النشاير
يالله دخيلك وانت يارب ستار=تستر عيوبي يوم كشف الستاير
قم ياعويني واقد الشوق والنار=صف الدلال المكرمات البهاير
بده لراع الطيب والضيف والجار=فنجال كيفٍ منه ثارت عشاير
المرجلة والجود في يسر واعسار=تاجٍ لقومه ميزته النظاير
واخذ النصيحة واقبل بشور من شار=خذها تراها عون من كان ساير
خالط هل العليا هل العرف والكار=واسبح بحرهم واجن منه الدراير
مكسب مع اهل الطيب مقدار جذمار=يسوى كثير الكسب من وجه باير
وانا ولد رجلٍ كريمٍ وصقار=يفك نشب القوم وقت العساير
شاعر ولي بالشعر مارد ومصدار=غواص في غب البحور الغزاير
اسير واسعى واجتهد لأجل الاخيار=وعيني عى اهل السوء تقدح شراير
شارت وطارت همتي مد الأنظار=يالله تحسنها نوايا السراير
هذا كلامي صغته وقلته اشعار=والحمد لله عانني يوم اخاير
وسلامتكم ...
أعذرونا على القصور