السلام عليكم ورحمة الله وبركاته..
ايها القارئ الكريم..
إن فراق الاحباب صعب ومحزن لكل محب.وخصوصا الوالدين.وفراق والدتي حرك مشاعري لأقول الأبيات التاليه..
وإنا لله وإنا اليه راجعون..
باسم الله اللي بحكمه الكون آيل=اللي محد غيره يحدد للآجال
ومن عاش بالدنيا فلابد زايل=ومن زال عنها يفقده حي ما زال
وانا فقدت الوالده فقد طايل=من بعد ما عاشت لي سنينٍ طوال
وافاه ربي والخبر خطب هايل=الله يصبرنا على كل الأهوال
حين اودعوها في لحدها نصايل=فم اللحد غطوه لبنٍ وصلصال
وردوا تراب القبر وسطه عجايل=وحطوا نصايب قبرها بالتعجال
ودعتها واقفيت والدمع سايل=سيلٍ على الاوجان من قبل ما سال
الله يرحمها وتلقى الفضايل=مع ساكن الجنه وتنعم بالافضال
يمه عسى قبرك براح وخمايل=قطعه من الجنه بها زهور وظلال
ومنها الى الفردوس دربك سهايل=مغفور ذنبك والسبب حسن الأعمال
وصلاة ربي عد صايل وجايل=على النبي المصطفى خير مرسال
عبدالله الشويمان-الرعد..في 22-5-1434 هـ