السلام عليكم ورحمة الله وبركاته..
ايها القارئ الكريم..
القصيده التاليه شاركت فيها بحفل ابناء قبيلة عنزه.
بمناسبة تخرجهم من كلية الملك فهد الامنيه.برتبة ملازم أول.
اقول فيها...
ابدا بسلام الله عليكم يالرجال=قبل يفوع الشعر وابدابه اذيع
ودام الهجوس يمد قافٍ بالعدال=بسرد بيوت الشعر ما دمت استطيع
الوقت طاب وفرحتي فوق الخيال=في ليلةٍ عشنابها الفرحه جميع
نشارك بفرحة مغاوير النزال=ذخر الوطن ليمن دعاهم للفزيع
وولاد وايل مانثنوا دون الجزال=طولاتهم طولات مقدامٍ شجيع
تخرجوا ضباط ولا شك وجدال=من يطلب العليا وصل منزل رفيع
ومبروك مليون وعدد حب الرمال=أقولها إلكل عنزي حتى الرضيع
واطلب من الله ربنا هو ذالجلال=يحفظ وطنا والعدو جعله صريع
وعسى الأمن بالمملكه حد الكمال=ويعيش شعب بلادنا بامن وربيع
في حكم من هم فوق هامات الجبال=آل السعود اللي لأمر الله تطيع
في خدمة البيتين حسنين الفعال=ويدعون للاسلام بالكون الوسيع
وياللي تخرجتوا وسويتوا احتفال=عندي وصيه واحفظوها لا تضيع
ترى القسم ما هو بمزح ولا هبال=خلوه نصب عيونكم سدٍ منيع
كلمة شرف ما تحتمل اية ميال=والله على عرشه لناطقها سميع
وطاعة ولي الامر من حسن الخصال=واخلاصكم للمهنه من اجمل صنيع
الله يقويكم على حمل الثقال=ويجعل توافيقه تحالفكم جميع
واختم واصلي اعداد ذعذاع الشمال=على النبي المصطفى اطيب شفيع
عبدالله الشويمان-الرعد في شهر رجب 1434 هـ