لاحان وقت افطارنا وانتهى الصوم=فوق الموايد ماوعت نفس درسي
قمت اتفكر كل جائع ومحروم =واشوف جوع الشام في كل تبسي
تنسد نفسي واحمد الله واقوم =من عقب جوعي والضما ناض ضرسي
قالو هلي وشبك مع الفرح مهموم=قلت اتركوني ياهلي ودي امسي
هي فرحة الصائم لها جاه معلوم =وفرحة لقا المولى لها مال حسي
نحمدك يارب السما دائم الدوم =ياللي بجودك نالنا الخير محسي
من عقب فقر اهل الجزيره مع القوم=اغدقت لين الفقر بالناس منسي
نعمه من المولى وماهي لنا دوم = هذا نعيم وكل متروف يقسي
لاشفت حال الناس بالمال ملزوم=قمت افتكر وش لي ببكره مع امسي
امسي عسى انك تغفره منك مقسوم=وبكره بعلمك وانت لاشئت تكسي
يارب دينك حق ماله بنا لوم = لكن منهو يدّعي الدين لبسي
في مصر قام اهل العبايا على الشوم=وش فادنا اصحاب العبايا ومرسي
مرت سنه والحال من نوم الى نوم =مية سنه في فكر الاخوان هلسي
بانت سياسات الهوى كلها حلوم =يقلدون الروم من فكر فرسي
الدين له حكمه وله قلب مكلوم = ماكل من جا يدعي الدين يوسي
للدين همه والسياسه بها عوم =والدين مقعد صدق والملك كرسي
عهد الصحابه راح والعالم اليوم=كلن يبا يركب مع الناس جمسي
يالله طلبتك نصر يالله محسوم =للدين وانك شرف اركان خمسي
وانك تصلي عالنبي خير معصوم=محمد اللي درّس الحق درسي