[احمد الجريفاني]

اظلمت في عيني الدنيا ولا ادري وين اروح=قل نوم وظلم قـوم وكثـر لـوم ومضيعـه
ما اشوف الا الغرابيل اختفى برقـن يلـوح=لو تهيـا للسعـاده درب اكيـد ابـي اتبعـه
كل ما داويت جرح بجرح تظهر لي جروح=ادري ان اللي بكاسي سم اسمـي واجرعـه
ضاع عمري منصف لغيري لعذالي نصـوح=سقم حال وضيق بال وسـوء فـال مجمعـه
كني بسجن انفـرادي مغلـق بالفيـن لـوح=لا امل عفـون قريـب ولا تفيـد القرقعـه
ما تهنيت بـدلال ولا خبـر عنـي شفـوح=ولا شقيت بجمع مال الستر نفسـي مطمعـه
مثل عصفورن يحسدونه على ريشـن وروح=لا نبت ريشه يطيـر وسقـم حالـه يمنعـه
وش تفيد لعيني الدمعـه وقلبـي لـو ينـوح=اشهد اني مع همومي ضعت وسط المعمعـه
با الغثى وقتي كريم وباالهنا حظي شحـوح=اصبحت حالي مثل معمي عيونـه بصبعـه
ما ظلمت ولا سلمت ولا خلط طبعي بجـوح=دايمـن بيبـان قلبـي للخلايـق مشرعـه
كان جنبي من تناجيني قبـل تنـوي نـزوح=فارقت وامسيت هايم كـل مرقـاب اطلعـه
لا هناة ولا غنـاة ولا مشاطرنـي مـزوح=ما به الا نـزف مجروحـن وروح ملوعـه
كنت اطرز للاماني ثوب وابني له صـروح=ما تصورت القريـر يجيـه يومـن يفجعـه
كيف تصبح قمتي با الامس تحلم با السفـوح=وكيف تصبح جنتي با الامس نـار مولعـه
اشحذ الفرحه من الاحزان قالت يا لحوح=فرحتك لوهو بيدي حبل ملزوم اقطعه
لا نوى وقتك يهينك ما تقـدم لـك شـروح=من حكم مسبق عليك تظـن قلبـه يردعـه
اشهد ان الموت راحه واشهد ان الصمت بوح=السكوت دواي اظنه فـي زمـان الجعجعـه