هذيان كيبوردي
!
!
!
يا صاحبي جاك الخبر وإيّاك تَشْقيني = بعتابكم من قبل ما بي تلتمس عذري
البارحه يا صاحبي من زود ما فيني = قِمت ارتوي سمٍ وصاير في دمي يجري
ادري تقول اجنون ممكن انت تجفيني = ووالله وحده عالمٍ عن حالتي ويدري
مسموح لو تخطي عليّا وصرت تهجيني = بالضعف ما لومك ولو بعلان او سرّي
قلّي إذا قلبك قسى من ذا يواسيني = وانته عديل الروح هم والقلب والفكري
ابكت ابن عدوان قبلي وجات تبكيني = وعاهد ابن عدوان ابد ما غيرها يشري
كانت هناي ودنيتي كانت ضيا عيني = كانت تعرْف اللي على بالي وما يطري
لا جيت أبخطو خطوةٍ دايم توعْيني = واحسست انّ العمر عمري والدّهر دهري
وضحه إذا قلت اسمها فالإسم يحيّني = وضحه خفوق القلب لا والهمس والنثري
وضحه لذيذ العلم والإيمان ترويني = وضحه كنوزٍ للأدب اصبح بها مثري
وأعذب كلامٍ صادقٍ يشفي ويشفيني = وضحه يسبح لجلها هالنجم في الفجري
وضحه إلين الموت ينويني ويأويني = وضحه وحتّى لو نفذ من داخلي صبري
ما قد تخيّلت الفراق وكيف تصليني = ناره وانا للموت ولهانٍ ومنتظْري
يا كيف ادوّر بعدها من هي تخاويني = بعد الخويه النايفه يا كيف اقْتدْري
خوفي إذا نفسي نوت انفاسها اتْهيني = قدري بأني خاين و ما هان أحد قدري
ياللهِ ترْحمْها طلبتك لا تولّيني = ياللهِ عبدك انجلى مذلول مفتقْري
وعلى النبيّ محمدٍ امبلّغ الديني = يالله صلّي وسلّمٍ ما هَبّى من قطري
يا صاحبي جاك الخبر وإياك تشقيني = بعتابكم من قبل ما لي تلتمس عذري
\
/
\
ماجد المهدي