اخواني اعضاء منتدى الفطاحلة الكرام هذه قصيدتي في معاناتي في البحث عن الجيب وهي بعنوان ( اتعبتني يالجيب ) ارجو ان تحوز على رضاكم .
اتعبتني يالجيب بالشيل والحط=اسبوعين ادور لك ولاني بلاقيك
من المملكة وديتني دار مسقط=وبالشارقة ودبي جينا محاريك
وفي معرض المنصور شفتك مصفط=وحلفت مافوتك ولاني مخليك
ورديت على فلوسي وحطيتهن حط=وبلا تردد مامعي كشتهن فيك
والله لو مانته بقلبي مبلط=ماجيت ادور لك عشان باشريك
لانك على كل المواتر مقشط=ولاني اعرفك من زمان(ن) مخاويك
انت الذي ما فيه مثلك على الخط=في بر ولا اسفلت يصعب تحديك
قالو لي اليوكن وتاهو مجنط=فخامه وراحة عن الجيب تغنيك
قلت ايه ماقبل فيك عاذل محبط=كل الشفر والجمس ما تعيضني فيك
وارد امريكا لو يقولو مزبط=يالجيب لاندكروزر ماهو مساويك
اللي الى جا بالصحاري تورط=واكبر مصيبة لا غرز بالتماتيك
الحيل يبرد والحرارة على الخط=ولا عاد ينفع فيه خطه وتكتيك
والا انت ما يهمك صعود ومهبط=لو تصعب الطرقات ما هبتهن فيك
مركب شيوخ في المجالس تقلط=للشيخ هيبة وانت هيبتك بوديك