[الطائر المهاجر]

شيلة عبدالعزيز العمار

الطير لا من طار انسي رجوعه = ماله بحبٍ مع عنا الوقت عناه
انتي بديتي الهجر ماهو بطوعه= وكلن على ماقيل يتحمّل اخطاه
ماني من اللي ترتجين لْخضوعه= من صد عني اتركه ما اترجاه
حتى ولو نفسي لغيابه جزوعه= وحتى ولو قلبي نبض حسرة الآه
كان العشم تدرين خوفه وروعه= وتدرين جرحه نازفٍ مر فرقاه
سكّنك باعماقه تحفظك ضلوعه= واعطاك مالا اعطاه قيسٍ لليلاه
كنتي الأمل لا من تلاشى شموعه= تعطيه نور الحب يمشي على خطاه
وكنتي السعد كالفجر لحظة طلوعه= تفرح به طيور المحبه وتلقاه
تدرين لا غبتي تزايد وجوعه = ويحس في نار تلظى بحناياه
ادري تحبيني ولا انتي خدوعه = لكن من العذال ما فيه منجاه
كلما يبون القلب يشكي فجوعه= لا من تباعدنا وكلٍ بمسراه
لا تتركي قلبٍ هوى من جذوعه= غيرك فلا والله من قلبي اهواه