الى صديقي الشاعر عبدالله خالد البكر اهدي قصيدتي ( من وحي النجوم ) والرد انتظره مع نجوم العقارب
ــ ــ ــ
يالجدي لاتنقد على اللي يراعيك = اول يريدك بالمتاهة دليله
صحيح وقتٍ فات كلٍ طمع فيك = تقدى مسيره بالدروب الطويله
لكن زمان اليوم جديَه تماتيك = بالاكتروني ماهو مثلك نخيله
باقمار رصدٍ صح مافيه تشكيك = مايقبل التخمين بأية وسيله
وابرسله للي لزومٍ يراعيك = شبلٍ صغيرٍ نافلٍ فوق جيله
واقول له يابن التميمي مساعيك = وطيبك وتقديرك قليلٍ مثيله
والله يابو خالد ترى القلب يغليك = عبدالله اسمك مثل برق المخيله
وخوالك اسلم هم عمى من يعاديك = وحمل المراجل ماتأنّى لشيله
شيءٍ موكّد ماهو لازم انبّيك = والصدق ثابت لو ارادو بديله
يالشبل عشت وعشت هذي مغازيك = ماينطحه ولد الردي والهبيله
اسيوفها تشهد وترسم معانيك = بلوحة شرف ماهي تملّق وحيله
كم من قريبٍ لي عجز لايجاريك = والحر مثلك لاقنص هو دليله
هذي حصاني ماهي كفوٍ تباريك = الحقد فيهم والحسد والرذيله
وانا اتشرف في طهارة مماشيك = والرابح الي مثل هذا سبيله
واهدي سلامي لوالدك ثم انا اهديك = اعظم تحيه بالورود الجميله
يعيش ابوك الي بطيبه مربّيك = (ابن بكر )راع الشرف والفضيله
بالحال ضحّى دوني والحق يرضيك = وشال العسر عنّي وكل المليله
وقال اتكل والله لاجعل معاديك = مايفرق الدنيا نهاره وليله