[داعي الشوق]

متواضعة ،،

و للتواصل مع ذائقتكم الغالية

**********

وش حيلة اللي بالمحبه تولع = قلبه من اسباب الهوى فيه حره
يشكي عذاب الحب و النار تشلع = في جوفه المسكين تكويه جمره
ثارت زوابعها و قامت تجمع = لاهي مفارقته ولا مستقره
اقولها من يوم قلبي تقطع = و العقل مني طار و ازداد شره
على الذى حلياه طبعه مدلع = ابو جديلٍ شوف عيني يجره
والعين عين الحروالرمش يسجع = من فوق خدٍ زاهيٍ تحت غره
صرت بمحلي حايرٍ و اتطلع = مفتون به وآقول لله دره
مثل القمر لا تم في عشر و اربع = بس الخلاف يكون كل بمقره
غديت مثل اللي بحاله تروع = والقلب مني راغ و افتر فره
حبه سطا في خافقى ثم تربع = تل الحشى مني على حين غره
قفـّى و باب الحب لجله مشرع = ولا خبرت الباب مفتوح مره
كاس الهوى ذقته وقمت اتجرع = شربت كاس الحب حلوه و مره
يا حيلة الله كيف حالي تمزع = محدٍ من العربان حالي يسره
مسكين ياللي بالمودة مولع = أنشهد ان الحب كله مضره