[ابومياس]

الاخوة والاخوات اعضاء المنتدى
السلام عليكم ورحمة الله وبركاته
انه من دواعي سروري ان اتواجد بين كوكبة من الشعراء
واشكر اخي ورفيق الدرب استاذنا الكريم وشاعرنا القدير ابو عبدالله على الدعوة الكريمة

وان شاء الله اكون عند حسن الضن 0

نورك يغطي مطلع الشمس لابان= فيه الرضا والرزق بأول صباحه
الله ياهالفجر كم صرت شفقان= لمعانق الراحة اذا فيه راحة
شفني يافجر النور عايش وتعبان = دخيلكم مافيه وقت استراحة
ابي اتريح بين وردٍ ورمان= بضلال رمشٍ في ضلاله فساحة
واهل دمع العين من فوق الاوجان = واعلمك ليه دمعة العين طاحه
واغفي على صدرك اذا كنت طفشان= كني طفل يشكي العلل في صياحه
واهمس وانوح بعالي الصوت هيمان = واجاوب اللي فوق الاغصان ناحه
ياصاحبي هو باقي ٍ لي بالامكان = على الطريق من الزهاب اصطباحة
فاقد حنان وينتظر وبل هتان= يرسم ملامح بعد حزن انشراحه
لاصرت انا للهم والغم نيشان = لا والله الا دلة العقل فاحه
وش شرهة الضميان لاقيل ضميان = الا لينبوع الغلا من قراحه
غربة بذات الروح في وسط الاوطان = والدرب موحش ماحسبنا سلاحه
لو شفتني يافجر مقفي وزعلان = منك العذر ياصاحبي والسماحة
هذا الزمن مافيه شفقٍ وولهان= وقاحةٍ ياكبرها من وقاحة
اما انت يافجرٍ سطع والفضاء زان = تبقى كريمٍ في زمان الشحاحة
وتبقى كما ديمٍ من المزن هتان = وتبقى ثمر عمرٍ نبت له بواحة
ويحيط بك فلٍ وجوري وريحان = وهديتي لك قلب حطك وشاحه
تبي الصراحة خاطري بعدكم شان= هم ونكد يافجر هذي الصراحة