[الخنساء]

المشاركة الأصلية كتبت بواسطة احمد الجريفاني

الف(ن) انا اللي ذقت كاسات الامرار=دايم وروحي مشعلن وسطها نار
والله لولاني على الظيم صبار=كان انحسبت اليوم من ضمن الاموات
اموات ماذاقوا ولا يوم راحه=كلن قضى عمره يضمد جراحه
هذا الزمن لامن بغيت الصراحه=مابه معزه للذي ينكر الذات
الباء بقلبي خمسة الاف عله=اقلها فرقى وليفن لخله
جرح القدر ياويل قلبن يتله=ماينفع المفجوع كثر التنهات
انهت على من فارقت عن عشيره=وانا الذي ماقد تمنيت غيره
دنياي من دونه بعيني فقيره=مالي بعدها غير ترديد الاهات
التاء ترى بلواك تاتي من اقراب=حسب للادنى يافتى مية حساب
حذرى تبرهج يمهم درفة الباب=تدخل عليك ذيابة الغدر عجلات
عجلات خصن لامن اصبحت مديون=لاقيل حال فلان من دون في دون
لو انت تاجر لجل مالك يمارون=يحب راسك كل حاقد وشمات
الثاء ثلاث عقود ياخوك صابر=لاني بحي ولا سكنت المقابر
مجروح لكن فوق هذا مكابر=صارت همومي في فراشي مخدات
مخدات تلعب بي على ماتورا=غديت في بيتي تقل ولد برا
من يزرع المعروف يجزا بشرا=وش لي بدنين كل ابوها مرارات
الجيم جربت الزمن مع صروفه=عزيل حين ماتقدر ظروفه
جرحي كبيرن والملا ماتشوفه=اضحك وانا عايش حياتي بماساة
ماساة تكبر لاقفت الناس عني=بوجيههم ماغير اسولف واغني
وفي داخلي جرح الزمان امتثني=اعيش في حال الوزى والمواساة
الحا حسبت اقرب قريبن يواسيك=عن حر شمس القيض عطفه يذريك
لقيت ما بالقرب لا ذي ولا ذيك=الا رفيقن واثرت فيه نخوات
نخوات مافادت مع اغنى هل الكون=قرايبن للمرجله ما يعرفون
فزعاتهم تذخر لمن هم يحابون=اما القريب بشرعهم جعل ما بات
الخاء خبرت الناس باول شبابي=ياتون للفزعه الى حد بابي
كلن يقول ابشر مصابك مصابي=لاوالله الا راح وقت المروات
مروات قفت في زمن والديني=يا سرعها تقلب طباع السنيني
اصبر وتلقى كل شين يبيني=الخافي اعظم يا زمان الندامات
الدال دور من يعاشرك للله=لامن لقيت الاجودي لا تعداه
صادق من اللي يعجبك زين مبداه=تلقاه في وقت الوزى عذبن فرات
فرات يروي مايعرف الملوحه=وليا نخيته سلمك كل روحه
يعد جرحك واحدن من جروحه=من عادة الفريس تظهر با الازمات
الذال ذل النفس لاشخاصن انذال=اخس من لو عقبوك الف فنجال
لايعجبك من خضع الراس للمال=من عقب ماهو صقر يدعونه حداة
حداة ماتقدر تصيد الجراده=يرضى بذل ويصبح الذل عاده
الحرمله ماينتفع من حصاده=والحر دايم يفتهم با الاشارات
الراء رفيقك يا فتى من يناصرك=في حزة الشدات حولك يساهرك
الفرق واضح بين الايمان والشرك=الشرك له نارن و الايمان جنات
جنات عدنن للذي ينصر الدين= وعد به المولى جزا للمصلين
الي بمكه و الذي باخر الصين = الدين واضح ما يجي بالمراءات
الزاء زماني كيف يصبح عدوي= وانا الذي مقريه هيلي وضوي
عجلن علي بفراق واقول توي=مالي رجاء ياكود رب السماوات
سماوات سبعن والاراضي مثيله=الوقت مايرحم قلوبن عليله
لامتت باكر وحفروا لك نثيله=ثلاثة ايامن ومن عقبه اسكات
السين ساقتني ظروفي لحساد=قدامي احبابن وفي خلفي اضداد
خلوني اسهر ماتهنيت برقاد=مايعرفون ان المواجع كثيرات
كثيرات في وقتن شربنا مراره=مات الوفاء مغبون في وسط داره
هم يحسبون ان المغثه شطاره=النذل نذل ولو عكس وجهه مراة
الشين شفت بماضي العمر الاهوال=عاشرت ناس كثار من عدة اجيال
لو هو بخيل يعز من يملك المال=ولوهو حقير يكافوونه بزيجات
زيجات ياخذ من جماله يهول=وليا خذاها عشرته ما تطول
يزتها ببليس خله تسول=عافت ولد عمه على شان شيكات
الصاد صار المال معبود للناس=لا واحسافه صار للطيب مقياس
راع الشهامه ينعتونه بالافلاس=والاجودي خلوه للضحك مدعاة
مدعاة للنكته فقيرن مسيكين=لو فيه خير اصبح رصيده ملايين
لاتقردون البنت والراتب الفين=على ثلاث تزوج البنت بسكات
الضاد ضرتني طباعن خذيته=عن والدي ورثتها ما شريته
زود الثقه باالناس ليتي نسيته=كان استرحت ولاتحملت ويلات
ويلات ويلاتي من اللي تصافيه=تعطيه سرك باكمله واثقن فيه
ماتدري انه سفلتن ما يلفيه=الاشبيهن له والاثنين شبهات
الطاء طلبتك بر في والدينك=عند الولي ملزوم تافي بدينك
من قبل تولد كلهم محترينك=اظن ماتحتاج تذكير ووصاة
وصاة طاعتهم فرضها مسويك=احذر ابليس يدروشك ثم يغويك
لا فارقوا تلقاك تصفق باياديك=يقل توفيقك تعيش بمتاهات
الظاء ظروفك لاتقوله لغيرك=ولاتشاور شخص مايستشيرك
تراه يشمت بك عسا الله يجيرك=لو صب لك من حالي الهرج كاسات
كاسات حتى تختفي عن عيونه=يمسك قفاك وكلهم يسمعونه
وليا وصلك الهرج يهتز كونه=يبدا يحللف باالذي نزل ايات
العين عمرك خله يصير قسمين=دنياك عشها بس لاتغفل الدين
ولاتشرك برب البشر يا مسيكين=تصلاك نار ولا ورى الشرك منجاة
منجاة حظ اللي ذنوبه خفيفه=الله يغفر والاوادم ضعيفه
وحنا تحت عطفه ولطفه وكيفه=عالم نوايا الخلق لو هن خفيات
الغين غير كل طبعن يضرك=شاور هل التقوى ولك مايسرك
تر الرضا باالزيف لاطال شرك=اجزم ونفذ ماتفيد المراواة
مراواة مافادت كثيرن من الناس=الذنب له غفار والتوبه اقياس
احذر يصيبك باخر العمر وسواس=تراك تصبح عند عدوانك حكاة
الفاء فوادك ماهو دايم دليلك=العقل عن درب السماجه يشيلك
ولا تمهزا كان قالوا دعي لك=تر الله المعبود قبال دعوات
دعوات خله لك ولا تجعله فيك=وتر دعوة المظلوم ماهي بتخطيك
حصن فوادك وادع ربك ينجيك=خلك مع اللي ينصرك باالملمات
القاف قل العرف ياناس بلوى=لاجاك شخص يقول انا طير شلوى
وهو من اللي بعدهم عنك سلوى=كلن بعقله راضين لو هو فتات
فتات حنظل جنبته البهيمه=لو تاكله ما عاد باتت سليمه
من وهق المغرور سوى جريمه=مريض نفس ولا تداويه وصفات
الكاف كني عايشن لي مئة عام=ماتت بعيني كل الاحرف والارقام
اشوف نفسي بس في بعض الاحلام=اما مع الحاضر فلالي علاقات
علاقات تجمعني مع طباع الاجداد=ماني مع ايام المهازل والاحقاد
حنا رضعنا الحب والوصل بمهاد=مالي على وقتن نعيشه حسوفات
اللام لملمت الجراح وتوكلت=عن نخوة الهافين ياخوك بطلت
كنت اتعشم بس يومي تاملت=لقيت ما با الفار طاهر ونجسات
نجسات لو غسلت بمانن وصابون=مايقربونه كل ناسن يصلون
نصيحتي يااللي لقصدي تعرفون=حذرى معاشر من طبايعه عفنات
الميم منهوا ما يامن معاشه=وهو شباب مولعن با الطياشه
يجيه يوم يبيع حتى فراشه=الوقت ما يرحم اذا تهمله فات
فات وتعدى وانت واقف تراعيه=تظن يرجع ليه مستهترن فيه
اغنم زمانك يا فتى لاتخليه=من قبل ماتشكي ولا تنفع شكاة
النون نم مرتاح لاوفيت دينك=مع الاله ومرضين والدينك
لاكلت حق ولانجاس بيدينك=ولا ظلمت ولا تعمدت زلات
زلات كل الخلق عنده ذنوبه=مكتوبتن عند الولي ومحسوبه
يفوز دايم من يخاف العقوبه=ومن يتكل يغفر له الله عثرات
الهاء هوى قلبي وغاية مراده=اشوف من ياناس طول بعاده
في جنة الفردوس عضدي وساده=للي طباعه دايم الدوم عذبات
عذبات عذباتن قراحن زلالي=فقدتها وامسيت هايم لحالي
لافارقك في تالي العمر غالي=اصبر ياعل الصبر تكفير سيات
الواو وجدي مايعانيه غيري=والله مافارق حبيبي نظيري
قدام عيني كل مااقعد واسيري=طيفه يهيض داخل القلب عبرات
عبرات ضاقت به جميع المخاليق=حيثه تفتق بسرة القلب تفتيق
عسا الاله يفرج الكرب والضيق=واذوق عقب الحزن طعم المسرات
الياء يريدالله والناس يرضون=هو ربنا العالي وهو فاطر الكون
امره نفذ في حكمة الكاف والنون=وله رحمتن فاقت على كل رحمات
رحمات ربن نزل ايات قران=على الحبيب المصطفى خير انسان
صلاة ربي عد مارفع الاذان=على نبي الخلق راع الشفاعات

صح لسانك مليون ولايكفون

قصيدة جزلة من شاعر متمكن

ترجمت روعة المعانى

سلمت ودام حرفك