. .
. . .
فيضةٍ ينعش فؤاد الصب لون ثيابه = وصلتها وقت العصر والشمس في غيبوبه
تلتحف عذب السحاب وكنها مرتابه = واتمايل للغروب وكنها مغصوبه
فيضةٍ لون الربيع الغض لون الغابه = ترقص الازهار فيها رقصة الرعبوبه
والنسيم اللي تهادى والمشاعر جابه = ينتهض عذب القوافي يطلب المسحوبه
ياهجوسي وانتحي عن صاحبي وغيابه = اهتفي عن ديمة الوسمي هي المطلوبه
واكتبي عن شيخنا وعن ناره الشبابه = والدلال الصفر حوله بالذهب مربوبه
واكتبي عن لابتي والنعم فيهم لابه = مكرمين الضيف نعم اللابة المهيوبه
ياهجوسي وانتحي عن دمعتي واسبابه = ان طرا طاري المحبه ابعدي بي نوبه
وان ذكرتي من خذا قلبي بسهم اعجابه = اذكري اني من شريته ماشرا محبوبه
الله اكبر يوم قلبي يامر وينها به = واتغنى في هواه وشيمته واسلوبه
الله اكبر كيف كشر عقبها بانيابه = كن روحي من غيابه مدةٍ منهوبه
لابسٍ زيف المشاعر لبسه لجلبابه = والله اني بالغلا ماشفت يوم ذنوبه
ان غفت عيني حلمت وخافقي هلاّ به = وان صحيت العمر كني بالسحر مطبوبه
ياهجوسي مانهيت وقلت صكي بابه ؟! = ذكريني بالطموح وهامته ودروبه
يسعد الله هالشموخ وهيبته وحجابه = وخطوةٍ من قبل اخطّيها وهي محسوبه