يوم طارت طايرتنا من مطـاره=كم عـزيـزٍ فـوقـهـا فـارق عـزيزه
كنت اظن العمر مايترك مساره=أثر ساعات الهناء دايـم وجـيزه
ويوم دارت بالمدارج واستداره=وابتدى يظهر من السرعه هزيزه
رغم تكييفه غشت كبدي حراره=وخفت صمام الحشى يـنـقـز قفـيـزه
دمعة الفرقى بـمـوق العين حاره=وبانت العازه عسى الله مايعيزه
وصار قلبي يشتكي لاهوب ناره=وأثر حب الريم في روحي غريزه
وسالت دموعي من العين بغزاره=ودمعة المغبون بين الـنـاس مـيزه
والـلـه ان الـروح مـاهــذا قـراره=والرحـيـل عـن الغلا مانستـجـيزه
بس مقعاد الـغـثـى والله خساره=وانت ما تملك بوسط الناس بـيـزه
وسط جوفي خافقٍ يبي الصداره=وعـزة الـمـجـلاس للـعـاقـل ركيزه
ياكسبت اطراف عزي عن جداره=وبالـمـهـونـه ما نـبـي يـانـاس جيزه
خـوف قلبي لا بـغـى يـرجـع لداره=ما يـلاقــي رقـم تأشـيـره وفـيــزه