[ماجد الزيد]

ما عاد يعنيني الشروق! أشرق أو اظلم يا صفوق=الشّمس لأحترّت فنا لي عن لهايبها ظلال
القيظ ماتقتل سمومه لوهي في وسط العروق=والعاصفه لو قرّبت في وجهها الفين جال
صبح ٍ ظلام اتساوين مابينهن عندي فروق=الغيم عتّم بالفضا والرّيح تعصف بالرّمال
ياطير حلّق بالسّما خلّك سما من فوق فوق =لاعاد تنزل للثّرى لو يجهدك طرد المحال
شوف الحرار مشمّله جوٍّ صفا صادق صدوق =يسوى عروبة زنزنه مابين قيل وبين قال
هبّت هبوب ٍ من شمال ٍ صوتها صوت الطروق=صوت ٍ حداويّن صداه (أ)يردده صدر الشّمال
صدر الشّماليّ واتّسع ضيّق على قلب (أ)مخنوق=ما عاد يقدر يستمع شكوى ولا يسمع جدال
من يلعن الشّمس الظّهر يهواها في وقت الشروق=ياهي شرق ياهي غرق !خطّ الوسط ماله مجال
ابليس ويلعن بو جهل والقاتل (ا)يذم السروق=والزّاني يجلد محتلم !ذنبه على بنت الخيال
وخْضيّر الّي لانطق صج البسيطه بالنّهوق =يشكي غراب البين لانّه ينعق ان صدّر مقال
والّي تحمّل نهقة النّاهق ونعقات النّعوق=ماله بحرب المهزله نوقن ولا له من جمال
يعني مثل حرب البسوس ان كان ما جانا حروق=حامي لهبها واصل الّي معتزل خوض القتال
النّار نقوى حرّها حتّى تقرّب للخفوق=وان حرّته والله لا زيد النّار حرّن واشتعال
لو خضتها زلزلتها خسفن ومسخ و دوّ بوق=وان حلّ شقّقت السما وانْدكت اوتاد(ن) عوال
الله كفاني شرّكم ..وحقوقكم ماهي حقوق =جسّاس سبّبها وثار التغلبي ماهو حلال
حرب ٍ تثّور بالفضا واطرافها رعود وبروق=الله يولّف جوّهن ويْهلّن الوبل الزلال
إمّا اشرقت شمس السّلام أو علّ ملها من شروق=متساويه والله مغنيني عن الّي مايقال
لا عاد تشكيلي نهارك ! أشرق اظلم يا صفوق=مادام شمسي تختلف وآنا اعتزل حرب الظلال