امر انكتب والامر ماهو بيدينا = غصب افترقنا يابعد كل الاحباب
حلم وصحينا منه نكد علينا = وعد الزمن يوم اصبح الوعد كذاب
الله كم اهواك في كل حينا = والله يآنا انجن زولك اليا غاب
انا على فرقاك شخصٍ (ن) حزينا = والدمع يهمل كالمطر بين الاهداب
واضحك وانا بالقلب حزن(ن) دفينا = اخاف لايدرون ناسي والاصحاب
يامن جلست بعرش قلبي سنينا = هواك يا اغلى الناس للقلب نهاب
ياما ضحكنا يوم وياما بكينا = ويا ما همسنا بساعة(ن) كلها اعجاب
وياما تزاعلنا وياما رضينا = وياما ذرفنا الدمع في لحظة اعتاب
وياما بنار الشوق غصب انكوينا =وياما تبادلنا المشاعر على الباب
وياما تمشينا ورحنا وجينا = والحب يسكن فالضماير بلا احساب
وياما مسحت الدمع كالرافدينا = وياما من السانك تلقيت الالقاب
وياما كتمنا ضيقة(ن) ماشكينا = وياما بذلنا للغلا كل الاسباب
وياما وياما وكثر ياما حكينا =عن شوق جارف عن طموح(ن) لنا شاب
وفي لحظة(ن) غاب الامل مادرينا = حظ(ن) ردي والوقت ياناس غلاب
زمن وجهز جيش ساعة صفينا = كشر وبين ماخفاله من انياب
شقول بس شاقول ماهو بيدينا = يالغالية يوم اصبح الوعد كذاب