اهوى السرى لاضاق صدرى من الدار=وارحل عن اكدار الملا للفجاجى
على السرى عودت نفسى والاسفار=واسرى بها فى مظلمات الدياجى
مانى من اللى لاسرى الليل يحتار=مثل الرخم لاطاروسط العجاجى
ماراعنى زول الهواتيف لا زار=واحسوس منهم كيف نفخ العواجى
مادامنى حصنت نفسى بالاذكار=ماهمنى منهم كثير اللجاجى
حسبى اله الكون عن كل الاشرار=الواحد اللى من توكلة ناجى
سبحان من هو يدفع اقدار بقدار=واقدار ربى ماتجئ بالمزاجى
حسبى الاهى دافع (ن) كل الاضرار= هذاك حسبى يافتى واحتياجى
ومن يحفظ الرحمن ماهاب الاخطار=والله ملجأ كل خايف ولاجى
هذى وصاتى يامحبين الاشعار=يامن فهمتوا حجتى واحتجاجى
سيروا على درب النبى صاحب الغار=احمد رسول الله لاهل الحجاجى
منهج رسول الله مشكاة الانوار=نور على نور الوحى بزدواجى
خلوا مناهيج الضلالات للنار=واهل البدع والتيه واهل اللجاجى
الله جعل للدين حصن(ن) به اسوار=والجاهل اللى حام فوق السياجى
والله جعل للدين مشكاة وانوار= واعمى البصر ماشاف نور السراجى
نعمة اله الكون فى كل الاقطار=عمت على كل البشر بنفراجى
احمدك ياربى على كل محضار=بعداد رملة عالج (ن) والفجاجى
ياسامع المنطوق مادمت بيسار=ابذل اكفوف الجود دون انزعاجى
مد الفقير وصاحب الحق والجار=وخلك على باب الرجاء والتراجى
وخلك كما حر(ن) تعلى اذا طار=وان حط فى برج (ن) من الماس عاجى
حتى المراجل فيهن اكبار واصغار= وحتى الطيور ابهن صقور ودجاجى