[الطائر المهاجر]

ياقل ماشافت عيوني رجاجيل= وياكثر ماشافت ضفاع وحصاني
لا شفت واحدهم يخدعك بتمثيل= في مظهره او هرجته باتزاني
ولا من سبرته كاشفٍ للمداخيل= تلقاه لا رجلٍ ولا من الغواني
ماغير دلخٍ من دلوخ المعاميل= ممن وصل للجاه قبل الأواني
في وقت ما ينفع به إلاّ المساطيل= احجار "حاضر" ماتبي في ثواني
تلقى حديهم فاهم بكل تطبيل = بضمير ميّت موحلٍ في الهواني
متخصصٍ في النهب ماعنه تعديل= راشي ومسترشي ولا هو يداني
لأنّه كسب راع القرارات بالحيل= واصبح هو الموثوق في كل عاني
يبدا بمعاميله على آخر الليل= وفي الصبح بدري ف الوظيفه يباني
يامر وينهى من خضع من تماثيل= ومن عارضه خسران وقت الرهاني
ودام الفكر فكره ولا عنه تبديل = ما ينتج إلا كل فعلٍ مشاني
والوضع يتردى بكل المحاصيل= ولا الوم من اصبح بفعله يعاني
لو هو بيدي كان طبقت تحليل= على جميع اللي مسك بالعناني
ولو هو بيدي قلت من غير تطويل= "من اين لك هذا" بعزم وتفاني
حتى اضرب الفاسد ومن سار تختيل= ويصير عبره بين قاصي وداني
واتابع الخدمات والعين دربيل= واعطي الخلايق حقها بامتناني
حتى اقول الخط ماعاد به ميل= ونلحق بركب اللي وصل للعناني