[ماجد الزيد]

قال الذي جزلات قافه كتبها=وقلبه تراقص به ثلاثين شيطان
في تالي مْن الليل قام وطلبها=متخلوين بارض ٍ على راس ما بان
الجنّ لا جاها تزايد طربها=تلعب على القيفان وتطق طيران
النّار كنّ ضلوع صدره حطبها=وقلبه تفجر به من الشوق بركان
على هنوف ٍ كل جسمه شربها =تجري بدمّه كل عرق ٍ لها دان
لامن طرت خلا العرب ما قربها=ويسج في قفر ٍ عن النّاس بحلان
ياما رقى ياما نزل في شعبها=فكره يروج ورايج الفكر بلشان
وليا نظر راس الطويلة رقبها=كنّه يرود لشوف داعجِة الاعيان
بنت الرّجال اللي رفيع ٍ نسبها=اللي لطاريهم شهق سور برزان
لطّامة العايل إلى من حربها=عدّالة المايل من الانس والجان
كان الليالي واخلفت في عربها=ما تخلف عبيّة ولا تخلف حصان
يا شوق عين ٍ جوّدت في قربها=لو سيّلت ماها جرى الدّمع شعبان
لعيونك اللي غازياتن سربها=ترسل كتايبها وتسبي للأذهان
لا سلهمت , ترمي صواعق لهبها=تذيب جال طويق وتذيب ثهلان
الشّركسيّةٍ باش منها هدبها =جيش الحبش غازي على جيش رومان
امسك بعيني لين منّي نهبها=نظرة غلا ويّا ابتسامة ورضوان
و ثغر ٍ تبسّم لي و روحي سلبها=برق ٍ تلالا يطري طروق هزّان
ماهي هيا يوم إنّ محسن جذبها=إلا عناق وكلّ ما غيرها .شان
الله عليها يوم حطّت ذهبها=غازل نحرها لين من رقّته لان
اليا مشتْ مهره تزايد خببها=يوم الشّعَر كنّه سبيب ٍ بميدان
جتني وربّي في خفوقي سكبها=ميّن طهور وخالطه ريح ريحان
اميرة ٍ في حسنها مع ادبها=بنت القروم وصفوة عيال عدنان
طفلة وقلبي راح كلّه , سببها =فدوه عيون الرّيم يا طير حوران
الشوق مندوبي وهو من ندبها=وويله على فرقى المواليف شامان
الطف من الحور العريبات وابها=في حدّها ملهن على الزّين بيبان
تبارك اللي يوم سوّى وهبها=عذب السّجايا وكل شيِّ بميزان
ذربه , سخيف الهرج عنْها جنبها=عيطا عزيزة نفس معسولة لسان
التّوت يشكي من حلاوة عنبها=لا من تمخطر حكيها عذب الالحان
الزّين وافي والحسب , هو حسبها=والدّين .منها قمت اصلّي مسيّان
يسقى على قلبي ايلامن كسبها=وإلا فلا والله على البيض شفقان