[ماجد الزيد]

اعرفك واجهلك واعشقك كلّي لـك = غامضه واضحه ويشِ قصّة هلـك
قاهـره ساحـره مُتعَبـه مُتعِـبـه = لك يذل كل اميرن عزيـز ومَلِـكْ
لو تمري على كـل ارضـن قفـر = اعشبت وانورت لك ربـت يامَلَـك
ماعذبك ما افتنك كلّي لك ما حسنك = فارعه شارعـه نيّـره كلّـي لـك
جلّ ربّن خلـق حسنـك وركبـك = جل من صورك جل مـن عدلـك
كن حسنك اتى من جنـان الخلـد =حط في ارضنـا ولّ يـا ماجملـك
بوصفك ياهنوف(ن) لطوفن عطوف = كي ماتشقى بحور الشعـر ببدلـك
وجههـا كالبـدر لابـدر واستمـر= مع خدودن ورودن حمـر تندلـك
والشفايف جمـر الا موتـن حمـر = تذهلـك تحرقـك تذبحـك تقتلـك
خلفهن ابيض الثلج صافي السنـون= ثلج ونار اجتمع كلهـن فـي فلـك
والخشم لاضحكت لاحكت لابكـت = غمد سيف(ن)لتلك الهنـاديّ تلـك
والحواجب رسم مثّل سيف الحسـم = قلبي ناشك على غفلةٍ مـا امهلـك
والعيون العيـون العيـون العيـون = تذبحـك ياولـد بالرمـش تسملـك
والصدر منهـا بـارزن خـارزن = كنّه اليا شهقـت فـز خيلـن فلـك
والحشا لاحشـا منهلـس منملـس = اولـك اخـرك اخــرك اولــك
خصرها عود راكن دقيقـن نحـل = لو يولّج وسط مجولـن بـه سلـك
لامشت كل شيّـن معاهـا مشـى =لاوقفت كل أحـدن وراهـا يلـك
ولفخذ متخذ وضـع حيطـه حـذر = يرتعد في شـدد واقفـن يصطلـك
مزدهـر مدهـر صبّتـه للـقـدم = اسفلـه بارفعـه باولـه منـدلـك
ساقهـا منبـرم والمفاصـل بهـا = كنّها محيّره فـي حريـر السلـك
سترها شعرها ان فلّتـه وارختـه = لفّهـا عفّهـا مثـل ليلـن حـلـك
زلزلت خافقي يوم عنّـي ابعـدت = ويل من تهجره في هيامـه هلـك
بعدها همت فـي كـل واد وقفـر = لين صاح الحجر باكين رح هلـك
السبع رابضن والضبع خافض(ن) = يرقبنّي ولا حولـي مـن منسلـك
شفت موتي دنا ثـم شلـت القنـا = قال وحش البـلا حبّـك مسربلـك
قلت تعرف كـلام البشـر تنطقـه = قال من جـاورك يذْهَـل ويذهلـك
غارقن بالهـوى والغـلا ذابحـك = كل يـوم انتسمـع معـك بجزلـك
الغـرام الـذي عذبـك وانهـكـك =له سكن كل وحَش والسرب ظللـك
والحبيـب الـذي يافتـى باعـدك = نطلبه بعد قطـع الحبـل ياصلـك
قلت له وصّ ذيـب الوفـاء يبلغـه = ويْعوي له ترى ماجـد(ن) يطلبـك
مات قلب الفتى من بعـدك وفنـى = ارحمـي ماجـد(ن) والله يحللـك
لايطول الغياب الزعـل والعتـاب =لك يهون العمر على كف ازعلـك
خفّفي واصفحي واسمحي وادمحـي = تاب عن زلتـه للولـي ثـم لـك