ورايك شنو ؟ رسالة لشخصٍ ما !!

[محمد اسماعيل الرفاعي]

أنا أصلي بس
واحد كده
ما بتستفيد لو قلتا ليك
أطلع منو ؟
بطلع نفر من بين ملايين البشر
في القول بفتّش أحسنو!
ركّز معاي
أسمع كلامي وافهمو
عود ليهو بي قسطاس رؤاك
من تاني كيلو وأوزنو
وما ترجى أبداً يا حصيف
أقعد معاك
أعزف على أوتار هواك
تضبط كلامي تدوزنو
واجيب معايا كمان وعود
اقعد حِداكا تلحّنو
وأطلب رضاك
تديني ليهو إذن مروق
لامِن رؤاك تتضمنو
يا زول أقيف
أوعاكا ما تعمل حريف
داب بيني ما بينك صريف
إحساسي حر
بالمره ما ممكن تجي وتستوطنو
أنا قولي طالع من فؤاد
وإحساسي بيتو ومكمنو
ما كان هو أصلا من فراغ
خابر دروبو ومسكنو
ومزماري ما شرخو الزمن
لا شال نضارو ومحّنو
لا بعثر الرؤى والخيال
لامسّ عقلي وجنّنو
لا ختا في مُرحاك ظنون
أداهو درشه وبشتنو
لاكبا في قدح العجين
نادالو عامل يعجنو
لا جاب فرن لا حتّى صاج
خلا العوين
في خبزو يوم يتفنّنو
أنا قولي زي فلق الصباح
لون الشفق هو اللونو
واضح وضوح شمس النهار
بدر البدور بستأذنو
براق متل حد السيوف
شغل الفوارس بتقنو
بتّار ولا بيعرف هظار
فيهو الحهابذه اتمحنو
عدد الحروف
غـطّى الفراغ واللا فراغ
يابس القواحل بعطنو
خضّر متل طرف الجروف
نظم الحروف هو القنّنو
مالي المساحه سماع وشوف
راكز علي مدماك وطوف
ببني ويجمّل موطنو
وكان ما بخاف من الكضب
كل البغرفو من البحور
ويدّو الكلام عبق البخور
شان يوصفو الجيد والنحور
في مالطا يومي بأذّنـــو
وأنا حا أظل
واحد كده
وما بتستفيد
لو قلتا ليك
بطلع منو
بطلع نفر من بين ملايين البشر
لامِن أقول القول حريص
دايماً أفتّش أحسنو
ورايك شنو ؟

الجمعة 25 – 3 – 2011م

[صعبة المنال]

صح لسانك
فكر واسع

صعوووب

[نفحات حساسة]

سلمت وسلم فكرك..

وجاد بيانك

ويعطيك العافيه

[عرق الماس]

مشاركة جميلة يا محمد
تسلم يدك ويسلم فكرك..