أبوأنس/الشرقي .. والقوافي المشبوهة !!

[سناعيس]

بعد اذن أخي الحبيب الشريف الشرقي
ثوف أرد على أخي أبو أنث بعد ثح لثانه
اثتلم لاهنت الله يثلمك

ياثعد قلبك نغذته الدبابيث=ياعذتالك والهوى بك يلوفي
اثباب منهو ثايدك بالدواعيث=مشيه عدال وللحفر مايشوفي
كنه موثى ومن بقايا الجواثيث=يختلك وانته غافل وفي نكوفي
اللي لبث له من هدومه هداريث=أنا أشهد انه ذابحك مايروفي
يابو أنث بنثحك ترخي له الكيث=وتعطيه ماتملك مقابل ذلوفي
وحتى ولو هو فطث القلب تفطيث=من خف دمه حيلته لا تطوفي
أما يجيك بكل طوعه وهو هيث=ولا اشتر فراقه لو اثمه هنوفي

تم إبدال حروف السين والصاد والزا الى ثاء ليستقيم المعنى بالمنكوس

[ابو أنس]

سنعوس وش هي حيلتك فالثغ الراء=اللي يحط الراء ياء(ن)خفيفه
اللي هروجه تطرب القلب ودواء=هرجه ربيع القلب طبّه وريفه
الى زهمته قال ميحب1 بمن جاء=اطرب لهرجه وافرح لشوف طيفه
اقول زين ايقول حكيك به اطياء2=وان قلت أُقسم قال نفسك ظييفه3
وان قلت وين ايقول ابيوح 4ابي ماء=هيجك5يخلي القلب يسيع6 يجيفه7
اسمع حديثه وانصت بكل إصغاء=ودّي براه8 بكل كلمه يظيفه

1 ــ مرحب
2 ــ اطراء
3 ــ ظريفه
4ــ ابروح
5 ــ هرجك
6 ــ يسرع
7 ــ رجيفه
8 ــ اي حرف الراء منه

[سناعيس]

مالوم قلبك ياسعد في هالأشياء=حتى ولو هي من وليف بوليفه
احد الى منه هرج ياكل أجواء=واحد هروجه كنها هرج شيفه
ياحي ذاك الراء لياجاء بإغراء=من ثغر من قاله بكلمه لطيفه
اللي يدور سبي الألباب بإجلاء=ويكثر الرارات ولا حد(ن) يعيفه
ودك يطول لاحكى بحكيه اضفاء=على هروج للمسامع خفيفه
عندي على هذا شهود وأسماء=والكل منهم ماقلبها بكيفه

[ابو أنس]

ياصاحب الفتوى ترا ابيك تفتين=وانتا خبير بفتنة العين والقلب
بالك تذرّع باتباع القوانين=والقلب ماله من قوانين تحسب
الى خفق تختل كل الموازين=والى عشق ما يسمع المدح والسب
والى لمح ضبي الفلا دق تسعين=في الثانيه والحر في داخله شب
لاكنت داله ترقب البحر بالعين=سارح بفكر(ن)ماله حدود تحجب
سمعت لك نغمة موسيقى بتلحين=تدعيك وانتا في مكانك تِكَهرَب
واظنها ضحكه على بعد مترين=ضحكه وجاوبها بعد ضحكه اعذب
والى التفتّ الى الصبايا قريبين=كلن لبس لبس البحر ومتسكلب
ظنيت نفسي في منامي بتمكين=واغمضت عيني كود ذا الحلم يطنب
يوم اختفى حلمي رفعت الحجاجين=واثر الحقيقه مدّت اليد واقرب
قالن سلام وقلتِ ياناس انا وين=غصّيت من ريقي وانا اقول ابشرب
وتلخبطت عندي الصور والتلاوين=وجتني شفاحه ودي آطب وانهب
من دهشتي تضاحكن ضحكن بلين=قعدت اجاوبهن وانا اقوم وآطب
واحن حنّة موترن حن باثنين=يوم انهن اقفن قعدت آتحيسب

[سناعيس]

ماني خبير ولامطوع ولاشين=لكن أببذل ما أستطيعه واباعجب
يابو أنس تراك حملتني دين=إما قضيته يغضب العبد والرب
تفداك نفسي ياسعد والقريبين=امر وأمرك لك مطاع(ن) ويطرب
بنركب انا وياك مثل الشياهين=على ظهر ميراج مبرمج لها الدرب
والا انت عطني كان عندك عناوين=وان مابردت الكبد استاهل السب
باجوب كل الأرض وشتى الميادين=وإن مايجي بالطيب جبته لك بغصب
ياشوق من لاجات تمشي على هوين= وتقول يابيي بحبوه لها الشب
الأصل من بيروت وبزحله مقيمين=هي منوة العاشق وهي للهوى طب
مانفخت شفه ولاكحلت عين=ولاشاركت بستار ولاجربت حب
الله جعلها كامله زينها زين=ماهو مزور من مساحيق تجلب
هذي غناة العين عن شوفة الفين=مما ذكرته يوم تقعد تحيسب
وتر المهر موجود ملي الصوالين=يسوقهن ممرور ومخاوي(ن) ذرب
وابشر بسعدك ما أقوله لتطمين=نفسي تعاف الزاد ولاترغب الشرب
وعهد علي ان ماضحك لك حجاجين=مايساق لي فنجال وامشي مع الجرب

[ابو أنس]

يابو محمد جيتني بالمفيدي=كلامك احلا من عسل سدر بشهار
لكن أنا مانيب قلبي حديدي=خوّاف واذرَق من مفاريد الاطيار
بس اتمنى واتخيل وازيدي=واسبح بفكري بين الانهر والابحار
وارسل كلامي مع سريع البريدي=للي على شفّي ..ولمنادمه كار
اشكي هواجس قلب(ن) اخضر جديدي=ما شاب مع مَرّ الليالي والاقمار
يهتز من شوفة غزال(ن) فريدي=ويطرب الى منّه لمح غرّ الامهار
ويكتب حلومه مع بيوت القصيدي=صنعة خياله شاعر(ن)يكتب اشعار
ياالقرم يا راعي الطنايا سِنيدي=ما نيب منكر وقفتك ياابن الاخيار
ماهي كثيره وانت الاطخم عضيدي=عوايدك يا نسل شمّر وسنجار

[سناعيس]

طبعا مع الإعتذار الشديد للأخ الغالي الشريف الشرقي
على هذه المداخلات مع شاعرنا القدير أبو أنس
ولأنني أعلم أن أبو أنس لابد له وأن يرضي قريحته التي دائما ما تلح عليه
قلت أتعلم منه ريثما يستريح المحارب ويستأنف ماكان قد أمتعنا به معه من قبل

يابو أنس عادتك باسك شديدي=وش غيرك ياخوي وش اللذي صار
خل التواضع وحط إيدك بإيدي=واترك ألاعيبك وتغيير الأفكار
إن ماتجي سنعه وعلى ماتريدي=والا ياعلّه مالها دار ديّار
ترى التمني والخيال الأكيدي=مثل العدد لاجاك خانه وأصفار
مانته جبان ولابطبعك بليدي=شهم وطبعك دايم(ن) وافي أشبار
ولانته جبل متكون(ن) من جليدي=أجا وسلمى يشبهنك وصبار
أنا أخبرك للسباحه تجيدي=والبحر مايعجزك قطعه والأنهار
لكن توكل لاتزيد وتعيدي=ورتل من الأيات وردد بالأذكار

[ابو أنس]

الخوف كل الخوف من رجنة الدار =والحاضنه عندي لها مقعد وطنب
ان جيت والا رحت في رجلي وسار=قيد(ن) رضيته وان فلت زدت له كرب
والا هوى نفسي لو اقفاه غدار=قلبي رهيف ويطرب لهرجة الذرب
يدوي بي الهوجاس في غبّ الابحار=واتبع خيالي في التصاوير واطنب
واصدح بحلمي في روايات واشعار=كود اللذي مثلي على الطرق يكتب
آنس بصحبة مثلكم يابن الاخيار=والقى مع الشرقي طواريق تطرب
وابو زياد بجيته ملح وبهار=وايضا فلاح ان مر يمشي على الدرب
في المنتدى لقيت رفقه لهم كار=منهم تعلمت الأدب كيف يكتب

[سناعيس]

يابو أنس انت نفسك طويل ماشاءالله عليك
وبانتظار أبو زياد أو فلاح الى أن يعود الغائب الشرقي
لاهنت يالغالي

[ابو أنس]

المشاركة الأصلية كتبت بواسطة سناعيس

يابو أنس انت نفسك طويل ماشاءالله عليك
وبانتظار أبو زياد أو فلاح الى أن يعود الغائب الشرقي
لاهنت يالغالي

ماعليك زود يا ابومحمد
وانما هذا من تواضعك الجم
لك كل الشكر